డిసెంబర్‌ 29న విశాఖలో ఫిల్మ్‌ఫెస్టివల్‌    
అక్షర కిరణం, (విశాఖపట్నం సిటీ): విశాఖలో రెండో సారి ఫిల్మ్‌ ఫెస్టివల్‌ కార్యక్రమం డిసెంబర్‌ 29న డాబాగార్డెన్స్‌ వద్ద ఉన్న అల్లూరి సీతారామరాజు విజ్ఞాన కేంద్రం కళావేదికలో నిర్వహిస్తున్నట్టు ఇండియన్‌ ఫిల్మ్‌ మేకర్స్‌ అసోసియేషన్‌ వ్యవస్థాపకుడు పులగం రామచంద్రారెడ్డి తెలిపారు. డాబాగార్డెన్స్‌ ప్రెస్‌క్లబ్‌ క్లబ్‌ లో మంగళవారం నిర్వహించిన మీడియా సమావేశం లో ఆయన మాట్లాడారు. విశాఖలో డిసెంబర్‌లో ఫిల్మ్‌ ఫెస్టివల్‌ నిర్వహిస్తున్నామన్నారు. దేశ, విదేశాల నుంచి సినిమా ప్రముఖులు పాల్గొంటారని, వెయ్యి సినిమాలు ప్రదర్శిస్తారన్నారు. పర్యాటక, సినిమా రంగం అభివృద్ధి లో భాగంగా సినీ రంగంలో 24 విభాగాలలో పనిచేస్తున్న కళాకారుల ప్రోత్సాహం కోసం ఫిల్మ్‌ ఫెస్టివల్‌ నిర్వహిస్తున్నట్లు తెలిపారు. ఇప్పటి వరకు 8 ఫిల్మ్‌ ఫెస్టివల్స్‌ విజయవంతంగా నిర్వహించామన్నారు. 
జాతీయ అధ్యక్షుడు హెచ్‌.ఆర్‌.దిలీప్‌ కుమార్‌ మాట్లాడుతూ విశాఖలో రెండోసారి ఫిల్మ్‌ ఫెస్టివల్‌ నిర్వహించడం గర్వకారణం అన్నారు. ప్రముఖ నటులు, దర్శకులు, సినీ రంగం పెద్దలతో విజేతలకు బహుమతి ప్రదానం చేస్తామ న్నారు. ఏపీ ‘మా’ అధ్యక్షుడు, మాజీ డిప్యూటీ మేయర్‌ దాడి సత్యనారాయణ మాట్లాడుతూ ఆసియాలోనే శరవేగంగా అభివృద్ధి చెందుతున్న విశాఖ సినిమా హబ్‌గా మారుతుంద న్నారు. గత ఏడాది తొలిసారిగా ఫిల్మ్‌ ఫెస్టివల్‌ ని నిర్వహించి నట్లు గుర్తు చేశారు. ఫిల్మ్‌ ఫెస్టివల్‌లో రాఘవేంద్ర రావు, రాజమౌళి, సుకుమార్‌ వంటి ప్రముఖ దర్శకులు పాల్గొంటా రని తెలిపారు. ఈ ఫిలిం ఫెస్టివల్‌తో విశాఖకు రాష్ట్రానికి ప్రత్యేక గుర్తింపు వస్తుందన్నారు. ఏపీ మా అసోసియేషన్‌ కార్యదర్శి కుమార్‌ నాయక్‌ మాట్లాడుతూ విశాఖలో నిర్వహి స్తున్న ఫిలిం ఫెస్టివల్‌కు జాతీయ, అంతర్జాతీయ స్థాయిలో ప్రాముఖ్యత వుందన్నారు. సినిమా పరిశ్రమలో గల 24 క్రాఫ్ట్‌ నిష్ణాతులు ఎంపిక లక్ష్యంగా ఫిల్మ్‌ ఫెస్టివల్‌ ఏర్పాటు చేశా మని తెలిపారు. సంస్థకు విజయవాడ సింగ్‌ నగర్‌లో కార్యా లయం వుందన్నారు. ఏపీ ఉపాధ్యక్షుడు అనిల్‌బాబు నెట్టి మాట్లాడుతూ ఈఫిల్మ్‌ ఫెస్టివల్‌ విశాఖలోని అల్లూరి సీతారామరాజు విజ్ఞాన కేంద్రంలో జరుగుతుందన్నారు. 
కోసాధికారి ఆశా లత మాట్లాడుతూ ఫిల్మ్‌ ఫెస్టివల్‌ విశాఖలో ఏర్పాటు చేయడం సంతోషకరమన్నారు. ఈఫెస్టివల్‌కు విశాఖ ప్రజలందరూ హాజరై విజయవంతం చేయాలన్నారు. మీడియా సమావేశంలో జాతీయ జర్నలిస్టులు సంఘం కార్యదర్శి, సింహాచలం మాజీ ధర్మకర్త గంట్ల శ్రీనుబాబు మాట్లాడుతూ ఫిల్మ్‌ ఫెస్టివల్‌లో ప్రతిభ చూపిన సినీ రంగా కళాకారులందరికి అవార్డులు ప్రదానం చేస్తారన్నారు. సినిమా రంగంలో ప్రతిభకు ప్రోత్సాహంగా అవార్డులు అందజేస్తారన్నారు.