గిన్నిస్‌ బుక్‌ ఆఫ్‌ వరల్డ్‌ రికార్డు అందుకున్న చిరంజీవి
తనకు అభినందనలు తెలిపిన తెలుగు రాష్ట్రాల సీఎంలకు చిరంజీవి ధన్యవాదాలు    
అక్షర కిరణం, (హైదరాబాద్‌): గిన్నిస్‌ బుక్‌ ఆఫ్‌ వరల్డ్‌ రికార్డ్స్‌లో మెగాస్టార్‌ చిరంజీవి స్థానం సంపాదించారు. తనకు చోటు దక్కడంపై అభినందనలు తెలిపిన తెలుగు రాష్ట్రాల ముఖ్యమంత్రులు, ప్రముఖులకు అగ్ర కథానాయకుడు చిరంజీవి ధన్యవాదాలు చెప్పారు. ‘’మోస్ట్‌ ప్రొలిఫిక్‌ ఫిల్మ్‌ స్టార్‌ ఇన్‌ ఇండియన్‌ ఫిల్మ్‌ ఇండస్ట్రీ యాక్టర్‌, డ్యాన్సర్‌గా గిన్నిస్‌ బుక్‌ ఆఫ్‌ వరల్డ్‌ రికార్డ్స్‌లో చోటు సంపా దించుకున్నందుకు పద్మవిభూషణ్‌ అవార్డు గ్రహీత, మెగాస్టార్‌ చిరంజీవికి నా హృదయ పూర్వక అభినందనలు. తెలుగు చిత్ర పరిశ్రమకు ఆయన ఎనలేని సేవ చేశారు. ప్రపంచవ్యాప్తంగా ఉన్న తెలుగువారు గర్వించదగ్గ విషయం ఇది’’ అని ఆంధ్రప్రదేశ్‌ సీఎం చంద్రబాబు పోస్ట్‌ పెట్టారు. దీనిపై చిరంజీవి స్పందించారు. ‘’మీ ఉదారమైన మాటలకు, అభినందనల కు ధన్యవాదాలు చంద్రబాబు నాయుడు’’ అని పేర్కొన్నారు. తెలంగాణ ముఖ్యమంత్రి రేవంత్‌ రెడ్డి సైతం చిరుకు అభినందనలు తెలిపారు. ‘ప్రముఖ సినీ నటుడు కొణిదెల చిరంజీవికి గిన్నిస్‌ బుక్‌ ఆఫ్‌ వరల్డ్‌ రికార్డ్స్‌లో చోటు దక్కడం తెలుగు వారు గర్వించదగ్గ విషయం. ఈ శుభ సందర్భంలో ఆయనకు నా అభినందనలు’’ అని పోస్ట్‌ చేయగా.. దానిపై స్పందిస్తూ.. ‘’మీ హృదయపూర్వక అభినందనలకు థాంక్యూ సో మచ్‌ రేవంత్‌ రెడ్డి’’ అని చిరంజీవి రిప్లై ఇచ్చారు.  ‘చిరంజీవి కెరీర్‌లో ఇప్పటివరకూ 24,000 డ్యాన్స్‌ స్టెప్పులు వేసినట్లు ఇప్పుడే తెలుసుకున్నాను. అద్భుతమైన సినీ ప్రయాణమిది. మోస్ట్‌ ప్రొలిఫిక్‌ ఫిల్మ్‌ స్టార్‌ ఇన్‌ ఇండియన్‌ ఫిల్మ్‌ ఇండస్ట్రీ యాక్టర్‌, డ్యాన్సర్‌గా గిన్నిస్‌ బుక్‌ ఆఫ్‌ వరల్డ్‌ రికార్డ్స్‌లో చోటు దక్కించుకున్నందుకు కంగ్రాట్స్‌’’ అని రాజమౌళి ఎక్స్‌లో పోస్ట్‌ పెట్టగా.. ‘’థాంక్యూ డియర్‌ రాజమౌళి. వాస్తవంగా ఈ విషయం నాక్కూడా ఇప్పుడే తెలిసింది’’ అని పేర్కొన్నారు. 156 చిత్రాలు.. 537 పాటలు.. 24వేల స్టెప్పులతో అలరించి నందుకు చిరంజీవికి ఈ రికార్డు దక్కిన విషయం తెలిసిందే. ఆదివారం సాయంత్రం గిన్నిస్‌ బుక్‌ ప్రతినిధి రిచర్డ్‌ స్టెన్నింగ్‌, బాలీవుడ్‌ నటుడు ఆమిర్‌ ఖాన్‌ నుంచి చిరంజీవి ఈ అవార్డును అందుకున్నారు.